ARASAko autobusean sartu eta ARTIC izotz pistara abiatu ginen. Esan bezala han geneukan Gorka itxoiten eta berarekin batera Miren Munarriz andereñoa eta Pablo P. jauna! Sarrerako irudiarekin argazkitxo batzuk atera ondoren bertara sartu eta botak jaztera joan ginen.

Lehenengo ordua monitore batekin aritu ginen patinatzen edo hobe esanda...erortzen. Bai erortzen, monitore gaixoak intentzio guztia ipini zuen arren bertan bildu ginenon patinatze-maila ez baitzen sobera ona. Nahikoa lan genuen gutako askok zutik mantentzen! Baina pixkanaka hasi ginen zertxobait ikasten nahiz eta batzuk oraindik ere gelditzeko pistaren paretak erabili...Gutxi batzuk ordea (Elorri eta Miren besteak beste), erakustaldi ederra eman ziguten patinen gainean eta gure kontura barre itzelak bota zituzten ere.

Ikastaroarekin amaitzeko hockey-ra jolastu ginen eta jolasean ari
ginela Patxi Gorriz jauna agertu zen bisitan.

Ikastaroaren ostean, jolas ezberdinak burutu genituen denon artean eta nekea zein kolpeak agertzen joan ziren einean pixkanaka izotz pistatik irteten joan ginen guztiak. Egia esan, batzuk besteak baino gehiago sufritu genituen gure gorputzean izotz gogorraren kolpeak eta gure aurpegian lurraren laztan hotzak. Baina kolpeak kolpe eta nekeak neke guztiok irten ginen izotz pistatik irrifar batez ahoan.

Goseak jota, bertan aurkitu genuen txoko txiki bat gureganatu eta jan genuen bakoitzak bere bazkaria. Bazkalostean giroa animatzeko Miren eta Oihaneren eskutik eztabaidatxo alai bat bizi izan genuen, inguruan zeuden elkarrizketa txiki guztiak itzaltzen joan ziren azkenean guztion arreta eztabaidatxo horretan murgildu zelarik, nola ez, bakoitzak bere iritzia emateko aukera izan zuen eta batzuek ederki probestu zuten aukera hori.

Azkenean, etxera itzultzeko ordua iritsi zen eta autobusean igo ondoren begiak itxi eta berriz irekitzerako Tuteran geunden.